[轉載/Youtube] 講到生育，有人一追追三件，有人就話追到生仔為止，不過對於「大哨」朗拿度嚟講，廣播情種多年後日前宣佈已經完成結紮手術，間輸精工廠從此關門大吉，響應當年關德興師傅所宣傳嘅：「家庭計劃，男子有責！」「大哨」家陣已有4個子女，唔通怕將來太多人分身家，所以湊唔成一支5人足球隊都在所不惜？
到處留情湊夠兩個好字
2010年即將過去，雖然今年朗拿度養傷時間唔短，不過佢都好忙，好似4月就迎接佢女朋友安東妮為佢生嘅第2個女愛麗絲，到年尾仲忙，除咗搬入聖保羅豪華別墅之外，仲要還風流債。
佢接受DNA測試後，證明同一位新加坡5歲男童阿歷士係父子關係。雖則「大哨」口口聲聲話歡迎阿歷士加入大家庭，仲話其他3名子女唔介意，但知情人士講，佢突然又多一件，對於生育怕怕，決定引刀成一快－－－ 唔係切，係紮啫。
拆禮物日宣佈紮咗
查實「大哨」突然多咗個仔，怪就怪佢風流成性，喺02年巴西奪世界盃後嘅東京慶祝會上認識阿歷士嘅媽媽，即時食指大動；到04年隨皇家馬德里東來就同人發生關係，搞大咗。「大哨」咁了解自己，心明自己仍然正值壯年，話唔定日後見索女色心又起，所以決定做結紮手術，到前日拆禮物日宣佈呢個消息。少咗個同「大哨」留後嘅機會，對於一啲有目的去埋「大哨」身嘅女子嚟講，肯定係壞消息。
謂番「大哨」，家陣佢已經有兩仔兩女（朗拿德、阿歷士、蘇菲亞同埋愛麗絲），其中德仔、阿歷士同埋愛麗絲都係4月份出世，「大哨」就話到4月就會搞個超盛大嘅生日派對，一次過同3個子女慶祝，熱熱鬧鬧咁咪幾好。
YouTubeHK 精選影片 www.youtubehkvideo.com [主頁] [最新影片]
No comments:
Post a Comment