YouTubeHK 精選影片 02: [科技] IT龍門陣魔童單挑大班

[轉載/Youtube] November 26, 2010 電訊魔童王維基一向係科技潮人，大班鄭經翰則 iPhone不離手，兩位科技達人噚日出席香港資訊及通訊科技獎揭幕禮，喺「數碼龍門陣」環節上，魔童話手機轉款密、各個品牌嘅火牛又唔統一，大嘆唔夠環保。大班即時發揮名嘴本色，話香港幾個收費電視一間一嚿解碼器，令佢屋企擺滿呢啲「一嚿嚿」，阻地方之餘又製造好多電子廢物，比手機製造商更唔環保。魔童聽到無奈苦笑，話統一解碼器唔係佢一個人話到事，要競爭對手肯先得。

高錕學識玩 iPad

講開數碼趨勢，大班不忘賣廣告，話佢個雄濤數碼電台第時有得聽仲有得睇，聽眾用智能手機聽電台嗰陣，例如講緊交通擠塞，電台可以同時喺手機顯示交通情況嘅圖片；聽教英文節目時，手機又會有英文字串法等，總之除咗片段之外乜都有。
另外，同場嘅評審盧永仁話，早前幫諾獎得主高錕搞慈善基金時，送咗部 iPad畀高錕，呢位患咗腦退化症嘅老人家已經識用 iPad睇相，放大縮細，相信有助佢保持記憶力。