[轉載/蘋果日報] 早前經歷內訌風波嘅社民連，最後由月初特別會員大會透過黨內公投否決解散現有內閣嘅建議，結果黨內再次回復較為「和諧」嘅局面，噚日喺旺角一間酒樓舉行嘅四周年酒會同籌款晚宴，都冇黨內反對派踩場，成為罕見有社民連但冇示威嘅河蟹場合。
余若薇贈字畫拍賣
雖然喺政改問題上擘晒面，但民主黨黃成智同涂謹申噚晚都有出席；公民黨除咗梁家傑，黨魁余若薇人到禮到，捐咗一幅題上王安石《梅花》詩嘅字畫出嚟拍賣，余大狀話，喺五區公投結束後嘅記者會上，記者起勢追問「倒余潮」，長毛當時就背出《梅花》代答，表示佢好似嚴寒之下先開花嘅梅花，咁啱嘅就做，余大狀今次就以同一首詩做人情。結果幅字畫拍到 2.2萬蚊，據講由一位商人投得。
現場筵開 57席人頭湧湧，雖然一如所料冇任何一位官員到場，只得立法會主席曾鈺成捧場，最估唔到嘅係酒會 5點零鐘開始，佢已經速速現身，怪唔得建制派成日呷醋話曾主席偏心社民連、尤其長毛啦。雖然政治理念唔同，但社民連對曾主席非常客氣，冇用「示威」或「抗議」形式迎賓，仲請曾主席坐定定，欣賞佢哋製作嘅全民公投短片。短片全長 3分幾鐘，曾主席睇得非常入神，之後亦應邀觀賞現場有關社民連發展嘅展覽。
曾鈺成拒收禮義廉 T
既然曾主席咁畀面大駕光臨，社民連義工都「禮尚往來」，諗住喺現場送件要嚟義賣嘅「禮義廉」 T恤回禮，但曾主席一見 T恤即尷尷尬尬咁笑，陶君行見狀就送咗本自己寫嘅《抗戰二十年》畀曾鈺成兼幫佢擋駕。
啱啱做完眼部手術嘅創黨主席黃毓民，依然係社民連最高精神領袖，當毓民因為要休息而提早離場時，在場全體會員忽然一齊起立向毓民舉杯祝福。黨爭過後再上路，首要當然係團結，大嚿陳偉業喺台上表明，唔理「阿豬又好、阿狗都好」，如果唔認同社民連嘅唔該即刻 out；長毛仲激，無啦啦喺台上跪低，話百分之四百相信個黨團結。噚日唔見馬草泥現身，有消息稱佢拉大隊去毓民間牛肉麪檔自行慶祝，難怪場內咁「河蟹」。
YouTubeHK 精選影片 www.youtubehkvideo.com [主頁] [最新影片]
No comments:
Post a Comment