[娛樂] Barbie姐廖祉甯宇宙最靚

[轉載/互聯網] 「Barbie姐」廖祉甯宇宙最靚 11月15日

以「寸嘴」出位、一年內玩盡港姐、亞姐的「Barbie姐」廖祉甯，憑無厘頭對答方式，又自稱不愛戴Bra令人留下深刻印象。原來Barbie姐選美背後目的是希望逃離愛情魔掌，跳入另一個世界，並揚言要以「天下第一」靚女姿態成為黃子華接班人，始創性感＋Cutie＋傻更更自編自演棟篤騷！

要在娛樂圈生存，不同人用不同方法出位，「Barbie姐」廖祉甯憑着「翻版郭可盈」的樣貌參加「香港小姐」和「亞洲小姐」。為求見報，Barbie姐每次現身定必有驚世言論，如自稱靈魂在外星、肉身在地球；又指大髀瘀傷是最新紋身，隨時捽得甩；務求令你目瞪口呆！她說：「之前受感情困擾，整爛咗部Notebook，搞到半年冇得上網，冇人話我知原來我咁受歡迎同咁多人關注，直至我上網 Check番以前嘅新聞同YouTube，我諗如果唔識自己都會覺得呢個人幾乞人憎！」
選港姐為逃情

相信不少人認為Barbie姐是想借選美做踏腳石加入娛樂圈，但她說：「係錯，美麗誤會，唔需要選美，對自己美貌非常有信心同肯定。當初因為情緒問題，好想離開原本生活嘅圈子，跳入一個我唔認識嘅世界。參選港姐係冇諗過加入娛樂圈，但唔知點解有太多人關注我，令我有啲不知所措。」選港姐落敗，幾個月後，Barbie姐捲土重來參選亞姐，但她仍死撐到底：「亞姐面試第一日，正係我準備去婚姻註冊署結婚嘅同一日，如果當時我去咗金鐘註冊，今日大家唔會見到我，總之改變快過變化，應該係改變永遠趕唔上變化。」每次答問題，Barbie姐都會有一大堆理論，因此惹來外間抨擊她「寸嘴」和無厘頭等，更被亞姐評判羅霖、黎燕珊等直斥EQ和操行有待改善，讓她六強止步，Barbie姐似乎憤憤不平：「我同評判相處時間只係台上嘅五分鐘，根本唔知道佢哋從邊度了解我，或者係佢哋口中嘅所謂工作人員，可能以訛傳訛，又可能有人擺咗部監察器喺我身邊，Check吓我每分每秒待人接物嘅細節，每個人嘅標準唔同，但我都好接受長輩（前輩）嘅教導，會好小心用語。」
性感+Cutie+傻

為擺脫「寸嘴」惡名，Barbie改名改變命運，她說：「廖祉甯呢個名太招惹是非，相士話我有五年財運，但入大運前會特別混亂同浮動，佢問我係咪有好多煩惱同是非，後來一一應驗，所以改咗個名好啲。」她並大膽認定行搞笑路線：「有朋友建議我朝住黃子華方向發展，因為我一個人隨時講十幾分鐘嘢，如果加以練習同寫埋稿，講兩個鐘應該冇問題。最近有啲經理人同導演聽完都覺得OK，靚女+性感+Cutie+傻更更，原來都係一個Image（形象）嚟o架！」

Barbie姐的「撒手鐧」還有其33C的驕人身材，早前被人影到玩健身時真空「飛釘」，她坦言不愛戴Bra：「以前做Model時唔知幾時On Call，唔想有條痕，着衫時又好明顯見到個Bra形，影響成件衫嘅效果，所以最好黐乳貼加Nude Bra，咁都出到事業線出嚟。」至於樣貌方面，Barbie姐更自信爆棚地說：「慶幸大家只係專注我『寸嘴』方面，已有數之不盡嘅話題。如關於樣貌方面，美醜好難界定，我覺得自己天生麗質，天下第一！但係咪你心目中鍾意嘅類型，我唔敢代表全部人去答，但係我同愛我嘅人心目中一定係冠軍。」
變面全因瘦身

早前有人爆料指她讀書時面闊、顴位凸出，鼻頭厚肉，與現在有出入，她說：「我瘦咗十幾磅，我兩次選美個樣都有啲唔同，但如果你話咁短時間去做磨骨削面實在太誇張，根本康復唔到！」

對Barbie來說，感情問題可能是致命傷，早前有傳她是已婚參選，但她有點不耐煩說：「之前有人問過我係咪註冊，我答話有好多同名同姓，但冇否認喎！點解話我擘大眼講大話？我冇諗過交代，屋企人同朋友都唔問我私人問題，每次拍拖就會頭昏腦脹，我絕對係屬於盲舂舂同麻木嗰類，以前覺得可以全職戀愛，但似乎唔合乎（做人）原則，依家人生已有另一個方向。（入娛圈？）我會諗點先算加入娛樂圈？呢個圈有幾大？我見有啲明星好似出吓活動、影吓靚相就係知名人士，我唔識條界線，如果有實際界線我先識答。」



YouTubeHK 精選影片 www.youtubehkvideo.com [主頁] [最新影片]