思基戀七國咁亂 馮仁昭四圍超： Zoie唔認撬余思敏牆腳 2010年10月16日
[轉載/蘋果日報] 蔡卓妍（阿 Sa）同陳偉霆（ William）突然大方認拍拖，而阿 Sa嘅前夫鄭中基（ Ronald）又認同有線主播余思敏發展緊，搞到滿城風雨，點知近日又傳 Ronald嘅舊愛楊千嬅老公丁子高嘅前女友譚凱琪（ Zoie），撬走余思敏嘅有錢男友陳朗，關係真係七國咁亂。
噚日 Zoie去奧海城出席活動，當記者問番呢件事時， Zoie明顯早有準備：「我哋拍拖唔係秘密，喺銅鑼灣鬧市拖晒手又點會係地下情，已經確定咗大家係單身先開始。」 Zoie話被指同陳朗去酒店偷情，佢感覺無奈：「我一向好鍾意去酒店食飯同飲嘢，所以睇到報道真係有唔開心。」
同余思敏冇芥蒂
Zoie話家喺有線撞到余思敏都有打招呼，唔會覺得尷尬，佢話：「成年人做每個決定都會諗過後果，媽咪都教我，做嘢過得自己過到人就得。總之唔存在撬牆腳，件事唔係雜誌講得咁核突。」講到余思敏同 Ronald嘅戀情， Zoie話兩個單身嘅人只要真心相愛就得。
噚日鄧紫棋（ G.E.M.）去學校宣揚禁毒訊息，之前佢同陳偉霆傳緋聞，家人哋宣佈同蔡卓妍拍拖，佢話：「佢係我阿哥，有同我講拍拖嘅嘢，都係早你哋（記者）少少知。佢叫我唔好講，唔係一世嫁唔出喎。」
阿詩讚阿 Sa勇
一向同阿 Sa私交甚篤嘅何韻詩，噚晚去尖沙嘴出席 Burberry新店開張活動，問阿詩會唔會覺得 Sa霆戀好驚訝？佢話：「我同阿 Sa識咗好耐，所以聽到都唔出奇。」阿詩話阿 Sa係一個敢愛敢恨嘅人，但始終夠膽公開承認都好勇敢好犀利。問到係咪一早知所以唔覺得出奇？又係咪唔只佢哋話齋拍咗三個月咋？阿詩即詐儍扮懵話：「吓？冇呀，唔知喎，總之冇講得咁誇張喇。」
YouTubeHK 精選影片 www.youtubehkvideo.com [主頁] [最新影片]
No comments:
Post a Comment