[胡鬧] 小學生商場玩火熱爆網

蘋果日報 - 20101002 - 隔牆有耳：喺商場玩火 o靚仔離譜


[轉載/蘋果日報] 政府每逢中秋前後都大事宣傳叫人唔好煲蠟，不過其實對家啲細路嚟講，煲蠟可能已經out咗。有人前日放咗條短片上YouTube，叫「彩明商場玩火」，可以見識到00後嘅新一代點樣玩火法。

大叫「爽呀」、「有型」
短片中至少有三個細路，喺將軍澳彩明商場2樓通道欄杆邊公然玩火，其中一個用打火機點着一支竹籤狀物體，然後攞起一支噴霧劑，噴向着火嘅竹籤，令到小火變成一個熊熊大火球。個細路連續玩咗三次，另一個細路重特登伸個頭埋去，要吹熄啲火。佢哋玩得好開心，大叫「爽呀」、「有型」，似乎完全唔知乜嘢叫做危險，亦見唔到有人阻止佢哋。
雖然條片喺網上人人都睇到，但領匯發言人竟然話，彩明商場嘅保安前晚見唔到有人喺商場內玩火，如果見到，一定報警處理。
根據機電工程署嘅資料，喺市面上出售嘅各類型噴霧劑，唔少係用石油氣混合化學物品，加壓至液體狀態儲存喺罐內，所以用嚟玩火真係好危險，隨時玩火變自焚。


YouTubeHK 精選影片 www.youtubehkvideo.com [主頁] [最新影片]