[轉載/蘋果日報] 聽日10月3日，係民間電台五周年台慶嘅大日子，晚上將會筵開50幾席，屆時唔只有「社運歌星賀台慶」，仲有「萬千星輝拍賣會」，連正在醫院療養嘅華叔都答應到場祝賀，仲拍心口破天荒捐出「墨寶期貨」，供民台拍賣籌款。台長「阿牛」曾健成更預告，屆時將有突破性宣佈。
新台歌《寧鳴而死》
阿牛話，五周年籌款晚宴反應熱烈，本來訂咗旺角倫敦酒樓五樓，頂籠擺到50圍，點知家賣咗差唔多成57圍嘅餐券，幸好酒樓方面安排到大啲嘅三樓畀佢哋，先夠擺。家只餘小量餐券，大家欲購從速。
答應咗出席嘅嘉賓朋友亦星光熠熠，有民主阿伯李柱銘、社民連黃毓民、長毛梁國雄、港台謝志峰、商台潘小濤、陶傑等，又請咗毛孟靜同彭志銘做主持。「樂壇長毛」周博賢仲會親自獻唱佢為民台作曲填詞嘅新台歌《寧鳴而死》。八方有幸獲得首歌嘅全球獨家首播權，大家聽完應該都會同意，真係幾有feel，一開波就道出民台五年來公民抗命嘅精神：「為何利用大氣發聲有罪，法律變壓制工具？」嗰晚有得食有歌聽仲有嘢買，華叔不單止會向醫院請假到一到場，仲答應捐出墨寶畀民台拍賣，但由於佢喺醫院寫唔到字，大家可以競投咗先，遲啲佢一出院，就會兌現承諾，寫番幅字畀買家。
除咗華叔嘅墨寶期貨，仲有因為去咗梵蒂岡而無法出席晚宴嘅陳日君樞機捐出書法，尊子、馬龍、方蘇亦送出大作，供當晚拍賣。
會上有突破性宣佈
大家都傾力支持，反映民間對捍衞言論空間幾咁重視。回首過去五年嘅日子，阿牛都幾感觸，話由最初唔識點發射訊號，到民間電台2005年10月3日正式啟播，到法官判政府違憲，後來民台仍不斷被當局控告，淨係傳票都收到過百張，被控嘅人數亦至少22名。
阿牛預告，聽晚會宣佈一啲突破性嘅做法，詳情就賣關子。佢只希望，香港早日開放大氣電波，等民間廣播可以遍地開花，咁就冇白費佢哋五年來嘅努力。
YouTubeHK 精選影片 www.youtubehkvideo.com [主頁] [最新影片]
No comments:
Post a Comment