[忽然一周 第792期]娛樂頂點 足本爆《公主》結局 金家含淚飲毒酒
上周最高有 38點收視的《公主嫁到》，本周進入結局篇，劇情亦由最初胡鬧得啖笑到近日大奸狗陸續現形，連環陷害金家至家無寧日，集集高潮。
周四（ 30日）大奸妃惠英紅（韋貴妃）遭鍾嘉欣（四德）踢爆陷害佘詩曼（昭陽）惡行後，惠英紅即發難在眾人面前以髮簪自插而死。
惠英紅遭正法後，金家上下以為從此安享太平，點知一直扮好人的終極大奸狗蔣志光（羅道遠）終於現形，唔單止搞到阿佘要當眾摑奶奶關菊英自保，仲令陳豪（多祿）同阿佘要擊掌離婚，最後金家眾人在刑場含淚飲毒酒身亡。
不過善惡到頭，結局當然係奸人冇好收場，至於一直恨有子孫可以開枝散葉嘅金家，到最後亦兒孫滿堂，皆大歡喜。
相公，我哋來生再續夫妻情。
好，金家精神，喊住嚟，笑住走！
我金多祿忠君愛國，此心可比昭月，死落黃泉，今生無憾。
金家一眾人等在刑場聽候皇上發落，自知難逃一死的陳豪，為保阿嫂李詩韻（小玉）腹中胎兒，懇求皇上對金家其他人等從輕發落，但皇上心意已決，下令賜毒酒給眾人。
28集 30/9（四） 阿佘中毒吐血
雖然阿佘被貶為庶民，惠英紅仍怕有後患，就派人設法暗殺阿佘。殺手在茶中落毒，阿佘飲下中毒身亡。其實阿佘和陳豪做戲俾殺手睇，實行扮死引蛇出洞。
殺手在阿佘的茶中落毒，阿佘將茶飲落肚。
娘子，你點呀，你冇事吖嘛？
我個肚好痛，好辛苦呀！
阿佘飲茶後吐血，殺手以為得逞，實則陳豪和阿佘做戲咁做，引惠英紅落網。
奸妃伏法
一直作惡多端的惠英紅，被鍾嘉欣踢爆奸計，因不忿被皇上賜死，在大殿上向阿佘作大控訴後以髮簪狂插心口自盡。
你為咗掩飾自己惡行，剷除異己，殺害多條人命！
你唔好咁放肆呀，你砌詞誣衊本官，係罪犯欺君 o架！
鍾嘉欣在郭鋒（皇帝）面前，狂數惠英紅惡行，最初惠仍死撐唔肯認，但當鍾拎出證據時，無話可說的惠英紅即發難。
被鍾嘉欣踢爆後，皇帝即下令捉拿惠英紅，但惠快一步用髮簪自殺身亡。
31集 3/10（日） 抄家飲毒酒
皇上有意打造金器贈予吐蕃結邦交，此時陳豪俾老頂蔣志光擺上台，要他負責籌劃此事。其實本身是突厥人的蔣志光，多年前已混入唐朝廷，打算挑撥大唐和其他外族發起戰爭，以收漁人之利。這次叫陳豪運送金器，誰知蔣在運送時，派殺手在吐蕃皇宮引爆炸藥，導致多人傷亡。皇帝為平息吐蕃怒火，下令要捉拿金家一眾人等，在刑場賜飲毒酒。
陳豪和金家眾人將毒酒一飲而盡，陳豪臨死前在刑場外見到阿佘趕到，說了句「娘子，我……」便毒發身亡。
娘子，我……
嗚嗚嗚，多壽！
金多祿，你唔好死呀！
陳豪等人在刑場被判刑，被皇帝軟禁的阿佘趕到，見陳豪身亡，即時哭成淚人。
31集 3/10（日） 阿佘怒摑菊姐
陳豪被皇帝抄家，早先一步知道消息的阿佘趕抵金家，但此時欽差大臣已到並宣讀聖旨。阿佘情急生智，即兜巴摑了奶奶菊姐一巴，更在欽差大臣面前，揚言打奶奶已違媳婦七出之條，跟手要陳豪休自己。陳豪無奈和阿佘三次擊掌以斷夫妻之情。阿佘打奶奶大逆不道，但其實此舉只是權宜之計，避免和金家一併擒獲，自己可以抽身趕去皇帝面前求情。
家嫂，你做乜打我？
惠英紅死後，原本金家喜氣洋洋，忽然聖旨到，眾人正愕然之際，趕到的阿佘更聲都唔聲嚟手就摑咗奶奶菊姐一巴，全部人呆立當場。
我同你解除夫妻名份，禍福之事，絕不株連。
好，絕得好！
答應休妻的陳豪，含淚和阿佘三次擊掌，阿佘從此和金家脫離關係，金家被皇帝抄家，阿佘因此不用被捉拿至監牢。
31集 3/10（日） 陳豪阿佘再婚
奸狗全數盡誅，金家三 pair主角終可眷屬，全人類大唱「齊歡暢、同慶賀」，至於離咗婚的陳豪同阿佘，理所當然行埋再婚。而金家上下一直恨有子孫開枝散葉，最後亦如願以償。阮兆祥和李詩韻更誇張到連生了五個千金。
鍾嘉欣和銀屏（陳法拉）終嫁得有情郎，至於經歷過生死的陳豪和阿佘，亦再度結婚共諧連理。
話明喜劇，結局就梗係要大團圓啦，經歷劫難的金家，最後當然嚟個排排企晒幸福啦！
幾時先俾我生番個慈菇椗呀？
唔係吖，我有女萬事足啦！
結局交代陳豪和阿佘生了個千金，陳法拉和鍾嘉欣大肚，不過最勁都係李詩韻，為金家生了五個女，唔知肚入面嗰個係咪呢！
其實前一集相士卜一卜已經話李詩韻冇仔生，又話陳豪的第二任妻子，才可為他生兒育女，當時眾人不信，更指責他亂噏廿四。
31集 3/10（日） 蔣志光救仔亡
本身係突厥人的蔣志光，一直在大唐做奸細，在密室與同黨傾談殲滅大唐一事時，被馬國明聽到，馬國明上前質問時，身為突厥王子的王浩信（宇文傑）打算殺死馬以除後患，但被蔣阻止。事後王派人暗殺馬國明和陳法拉，蔣志光假裝對付兒子，但卻突然出手與刺客打鬥，最後雙雙身亡。突厥人奸計終被大唐識穿，敗走北方。
佢唔死，只會壞大事。
密室中王浩信發現馬國明，為怕影響大事，即揮劍斬殺他除後患。
主子，今次你放過佢，如果佢要做大唐走狗，我就親手將佢了斷。
王浩信殺馬國明，蔣志光即瞓身相救，更道出二十年前一家以至整條村被唐人滅絕經過，以圖令馬國明歸順突厥。
爹！
國家同個仔，我揀咗我個仔！
蔣志光為救馬國明，最後同刺客攬住死，臨死前終於聽到馬國明嗌咗聲「爹」，蔣志光終可含笑而終。
《公主》演員唔恨攞獎
《公主嫁到》叫好叫座，在暫時毫無競爭對手下，成為年尾台慶頒獎禮大熱，視帝視后幾乎是陳豪和阿佘的囊中物，雖然劇中演員演技備受好評，不過他們也異口同聲話唔恨攞獎，最緊要觀眾睇得開心。
佘詩曼：「我同陳豪合作過幾套劇，今次係最有火花，收視好當然開心，但我覺得演員做好自己每套劇，已經係對觀眾最好嘅回報。」
陳豪：「只要劇集令觀眾睇得開心就夠，唔會太過着重獎項，總之一切平常心啦！喜劇好難控制，唔否認有啲位 over咗，但有啲中咗。」
陳法拉：「唔知自己搞笑可以去到咁癲，對白比較難，好多古文，我都只可以靠死記，最緊要觀眾鍾意呢套劇，辛苦啲都冇所謂。」
監製梅小菁：「陳豪做過好多喜劇，但佢今次特別好。佘詩曼就做到不慍不火，比起上次佢做《絕代商驕》更進步。多謝觀眾支持呢套劇，希望結局收視破紀錄啦。」
撰文：娛樂組
YouTubeHK 精選影片 www.youtubehkvideo.com [主頁] [最新影片]
No comments:
Post a Comment