Header Row

[政治] 陳淑莊甩拖自謿剩女

隔牆有耳:陳淑莊變剩女 - 李八方 2010年10月28日


[轉載/蘋果日報] 公民黨議員陳淑莊Tanya係政壇新星,又有個拍拖八年男朋友英雄哥,事業愛情兩得意,可惜近日戀情生變,已經同英雄哥分手,回復單身。

感激英雄哥照顧
Tanya噚日同八方講,今次係和平分手,同舊愛再見亦是朋友,佢最感激英雄哥多年來無微不至嘅照顧,競選時忙到無時間食飯,英雄哥會送飯送湯,又會陪佢拉票,係超好男朋友。講到咁感觸,Tanya似乎唔係幾捨得呢段感情。據講兩人本月初分手,Tanya收得好埋,黨友都無察覺異樣,由於分手時正值將軍澳堆填區風波鬧大,Tanya全力跟進,有人話可能因此令佢唔得閒箍煲,慨嘆一段感情就此葬送堆填區,環境局局長邱騰華於心何忍?
如果命裏早注定分手,Tanya亦要收拾心情,佢噚日話現時只能寄情工作,39歲嘅佢又自嘲係剩女,暫時唔會太強求姻緣。為證明情傷復原,Tanya在八方面前講咗個爛gag,話公投時曾揚言先普選、後結婚,四叔就先抱孫,個仔後結婚。個gag雖然爛,不過八方聽完,都陪佢大笑。
講起分手原因,Tanya強調絕對唔係有第三者,而係佢工作實在太忙,雖然同英雄哥相處多年,兩人早有默契,但近嚟都覺得越來越難以維持下去。佢話身為直選議員,平日從早到晚開會,周末、假期都無得休息,要開居民大會、搞地區活動,而7.1、六四等日子,例牌節目係遊行集會,拍拖呢項活動,好難在時間表上佔一席位。

從政要犧牲好多
Tanya又話,即使有時間拍拖,撐枱腳時佢都掛住覆電話、睇文件,個腦塞滿工作,個心就喺立法會,形神俱無,根本唔係拍拖,對另一半好唔公平,既然係咁,兩人決定做個了斷。佢話自己感情、公職不能兼得,所以好佩服其他家庭生活美滿嘅直選議員。你睇人好啫,其實都有唔少議員離婚收場。從政要犧牲好多嘢,值唔值得,八方無從置喙,有緣嘅話,總會遇上真命天子。


YouTubeHK 精選影片 www.youtubehkvideo.com [主頁] [最新影片]

No comments:

Related Posts Plugin for WordPress, Blogger...